Го́споди, Бо́же на́ш, Бо́же си́льный и кре́пкий, вла́сть жи́зни и сме́рти име́ющий, люде́й и ско́т спаса́ющий и посыла́ющий ско́ро проси́мое все́м, с ве́рою к Тебе́ прибега́ющим и проше́ния и́х ми́лостиво исполня́ющий! К Тебе́ мы́, недосто́йныя рабы́ Твои́, припа́дая смире́нно, с ве́рою в сокруше́нном се́рдце про́сим и умиле́нно мо́лимся: при́зри ми́лостиво на ско́т се́й, одержи́мый не́мощию тя́жкой и болезнью па́губной, и ско́ро исцели́ си́лою Твоего́ благослове́ния, погашая жгу́щий вну́тренности его́ (скота́) пла́мень и боле́знь облегча́я; зловредительно деющие и губящие его́ ве́тры перемени на благоприятные и да́руй ему́ жи́знь и здра́вие, ра́ди моле́ния ве́рных люде́й Твои́х, к Тебе́ взыва́ющих: по моли́твам Пречи́стой Влады́чицы на́шей Богоро́дицы и Присноде́вы Мари́и, си́лою Честна́го и Животворя́щаго Креста́, покровительством небе́сных Си́л безпло́тных, честна́го и сла́внаго проро́ка, Предте́чи и Крести́теля Иоа́нна, святы́х сла́вных и всехва́льных апо́столов, святы́х победоно́сных му́чеников, святы́х безсре́бреников враче́й: Косьмы и Дамиа́на, Ки́ра и Иоа́нна, Пантелеи́мона и все́х святы́х Твои́х, и́бо Ты́ – исто́чник жи́зни и ея́ пода́тель, и Ты́ спаса́еши люде́й и ско́т, и Тебе́ сла́ву возно́сим, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.