Изведи из темницы душу мою, исповедатися имени Твоему.

Иисусе, Сыне Божий, помилуй мя.

Привлецы мене, да прииду к Тебе.

В темнице заключен есмь, Господи, и тьма окружает мя; связан многими узами железными, и несть ми ослабления. Расторгни узы, да свободен буду. Прожени тьму, да узрю свет Твой. Изведи из темницы, да прииду к Тебе.

Даждь ми уши слышати Тя. Даждь ми очи видети Тя. Даждь ми вкус вкусити Тя. Даждь ми ухание благоухати Тя. Даждь ми нозе приити к Тебе. Даждь ми уста глаголати о Тебе. Даждь ми сердце боятися и любити Тя.

«Настави мя, Господи, на путь Твой, и пойду во истине Твоей» (Пс.85:11). Ты бо еси «путь, истина и живот» (Ин.14:6).

Возми мое от мене, и даждь ми волю творити волю Твою благую.

Отыми ветхое, и даждь ми новое.

Отыми «сердце каменное», и даждь «сердце плотяное» (см. Иез.11:19), Тебе любящее, Тебе почитающее, Тебе последующее.

Даждь ми око, да узрю любовь Твою. Даждь ми око, да узрю смирение Твое и последую ему. Даждь ми око, да узрю кротость и терпение Твое и последую ему.

Рцы слово – и будет все. Ибо слово Твое дело есть.

«Верую Господи, помози моему неверию» (Мк.9:24).