Царю́ Небе́сный Всеси́льне! Молю́ Ти́ ся́, Влады́ко мо́й, Иису́се Христе́, ми́лостив бу́ди души́ мое́й, да не уде́ржана бу́дет проти́вным лука́вством, но да сря́щут ю́ А́нгели Твои́, проводя́ще ю́ сквозе́ пронырств те́х мра́чных мыта́рств и наставля́юще ю́ к Твоему́ милосе́рдия све́ту. Ве́м бо и а́з, Влады́ко, я́ко без Твоего́ заступле́ния никто́ не мо́жет избы́ти ко́зней духо́в лука́вствия.